النمل الأبيض و قدرته على البناء
- لو أنت مفكر أن البشر هما الكائنات الوحيدة اللي قادرة تشيد وتعمر كوكب الأرض فأنا جايلك بقي علشان نصحح المفاهيم ديه مع بعض وأوريك شوية أعمال فنية غاية في الجمال قدر يبنيها مخلوق صغير خالص يكاد لا يُري بالعين (هـات كوباية نسكافيـه وتعالي كمل قراءة)
بطل حكايتنا النهاردة هو النمل الأبيض صاحب أجمل المباني المعمارية والهندسية اللي بيقدر من خلالها إيواء ملايين الأفراد في فراغاتها لحماية المستعمرة من الخطر عن طربق بناء هياكل مُحددة ترتفع عن مستوى سطح الأرض بمعدل 3-4 أمتار وممكن توصل ل9 أمتار.
خليني أزيدك من الشعر بيت وأفهمك أكتر علشان تتخيل الدقة والجمال بنفسك وتعرف أن هياكل النمل الأبيض مش مُجرد هياكل عادية لا خالص ديه مُصممة بدقة عالية جدًا ومعقدة للغاية وكمان ليها صفات مُعينة عايزك تعرفها:
1- التوجيه:
أسطح تلال النمل الأبيض بتكون غير مُتجانسة حول المركز، بمعني أنها غالبًا بتكون ذات توجيه "شمال جنوب" علشان تستفيد من التشميس اليومي (قصده أن النمل بيصمم التل بحيث يوصل لتوازن حراري مُعين بين سطح مشمس تمامًا وآخر مُظلل تمامًا).
2- التبادل الحراري:
هنا عايز يقولك أن التل بيسمح للطرف المرتفع بدرجة حرارة أقل نسبيًا من حرارة التربة علشان أفراد النمل تقدر تقف فوق الأرض وكذلك النمل بيقدر يدخل إلي باطن التل هروبًا من الحرارة.
3- التهوية: مُعظم تلال النمل الأبيض بتمتلك فتحة عميقة للتهوية علشان تسمح بخروج الهواء الحار من المستعمرة للخارج وكمان فتحات جانبية لدخول الهواء البارد (تقنية عالية شويتين علشان يكونوا قاعدين جوه التل مرتاحين).
4- الإكتفاء الذاتي:
قالك بقي أن تلال النمل الأبيض بداخلها فراغ مخصص للمزارع الفطرية الخاصة بالتغذية لأفراد المُستعمرة، بيبذل النمل مجهود كبير في هندسة الفراغ لتهويته وتبريده بشكل مُتقن علشان يحافظ عليه في حرارة 1 و -1° خلال اليوم.
لذلك نقدر نقول أن تلال النمل الأبيض عبارة عن مدينة مُتكاملة مكتفية ذاتيًا بل إن الدراسات أثبتت أنهم مُنظمين جدًا خارج التل كمان بحيث أن النمل العامل بينقل التراب أو الطين من مكان لآخر، ونوع تاني من النمل العامل بيدمجه مع اللعاب ونمل تاني بيبني التل لحد ما يظهر لينا العمل الفني الجميل اللي حضرتك شايفه قدام عينيك وتقدر كمان تشوف تلال النمل الأبيض من القمر الصناعي علي Google map.
مين ألهم الكائنات الصغيرة تعمل كده؟ مين علمهم النظام والتعاون بالشكل ده؟
مين علمهم يحافظوا علي نفسهم ويحموا بعض من الحشرات والحيوانات الأكبر بالبناء العظيم ده؟ رب أوزعنا أن نشكر نعمتك وأن نحمدك دومًا.
{أَوَلَمْ يَتَفَكَّرُوا فِي أَنفُسِهِم ۗ مَّا خَلَقَ اللَّهُ السَّمَاوَاتِ وَالْأَرْضَ وَمَا بَيْنَهُمَا إِلَّا بِالْحَقِّ وَأَجَلٍ مُّسَمًّى ۗ وَإِنَّ كَثِيرًا مِّنَ النَّاسِ بِلِقَاءِ رَبِّهِمْ لَكَافِرُونَ}.
